കണ്ണമംഗലം: വികസനത്തിന്റെ പാതയിൽ പഴയ കെട്ടിടങ്ങൾ ഓർമ്മയാകുമ്പോൾ, അവയെ ക്യാൻവാസിൽ അനശ്വരമാക്കി ശ്രദ്ധ നേടുകയാണ് ചിത്രകാരനും അധ്യാപകനുമായ എം.വി.എസ് കണ്ണമംഗലം. പേങ്ങാട്ടുകുണ്ടിൽപറമ്പ് എം.ഐ.എസ്.എം.യു.പി സ്കൂളിന്റെ പഴയ കെട്ടിടത്തിന്റെ ചിത്രം സമൂഹമാധ്യമങ്ങളിൽ വീണ്ടും തരംഗമാവുകയാണ്.
സ്കൂളിന്റെ പഴയ കെട്ടിടം പൊളിച്ചുമാറ്റി പുതിയ കെട്ടിടം വരാൻ പോകുന്ന പശ്ചാത്തലത്തിലാണ്, മൂന്ന് വർഷം മുമ്പ് അദ്ദേഹം വരച്ച ഈ ചിത്രം വീണ്ടും ചർച്ചയാകുന്നത്. പഴമയുടെ മനോഹാരിത ഒട്ടും ചോരാതെ വരച്ചു ചേർത്ത ഈ ചിത്രം അക്കാലത്ത് തന്നെ വൈറലായിരുന്നു. വിദ്യാലയത്തിന്റെ പഴയകാല സ്മരണകൾ നെഞ്ചിലേറ്റുന്ന പൂർവ്വ വിദ്യാർത്ഥികളും നാട്ടുകാരും വൈകാരികമായാണ് ഈ ചിത്രത്തെ വരവേൽക്കുന്നത്.
പുതിയ തലമുറയ്ക്ക് പഴമയുടെ അടയാളങ്ങൾ പരിചയപ്പെടുത്തുന്ന ചരിത്രരേഖകളാണ് ഇദ്ദേഹത്തിന്റെ ഓരോ കലാസൃഷ്ടികളും. വെറുമൊരു പെയിന്റിംഗ് എന്നതിലുപരി വരുംതലമുറയ്ക്കായുള്ള കരുതിവെപ്പായി ഇവ മാറുന്നു. ചിത്രരചനയ്ക്ക് പുറമെ കളിമൺ നിർമ്മിതികളിലും വൈവിധ്യമാർന്ന കരകൗശല സൃഷ്ടികളിലും ഇദ്ദേഹം തന്റെ പ്രാവീണ്യം തെളിയിച്ചിട്ടുണ്ട്.
പുകയൂർ വലിയപറമ്പ് മലബാർ സെൻട്രൽ സ്കൂളിലെ ചിത്രകലാധ്യാപകനായ എം.വി.എസ് കണ്ണമംഗലം മേമാട്ടുപാറ സ്വദേശിയാണ്. നാടിന്റെ പൈതൃകം തന്റെ തൂലികയിലൂടെ സംരക്ഷിക്കുന്ന ഈ കലാകാരന് വലിയ പിന്തുണയാണ് സമൂഹമാധ്യമങ്ങളിൽ ലഭിച്ചുകൊണ്ടിരിക്കുന്നത്.