പരപ്പനങ്ങാടി: പെരുവള്ളൂർ കാടപ്പടിയിൽ ആറുകിലോ കഞ്ചാവുമായി രണ്ടുയുവാക്കളെ എക്സൈസ് സംഘം അറസ്റ്റു ചെയ്തു. കണ്ണമംഗലം വാളക്കുട പുള്ളാട്ടിൽ വീട്ടിൽ ശിഹാബുദീൻ (35), പെരുവള്ളൂർ വട്ടപ്പറമ്പ് കോടമ്പാട്ടിൽ വീട്ടിൽ ഷാജി (43) എന്നിവരെയാണ് തിരൂരങ്ങാടി എക്സൈസ് സർക്കിൾ സംഘം കാടപ്പടിയിൽ നിന്നും കഞ്ചാവ് കൈമാറുന്നതിനിടെ പിടികൂടിയത്. കഞ്ചാവ് ചില്ലറ വിൽപ്പനക്കാർക്ക് കൈമാറിയതിൽ ലഭിച്ച 30,000 രൂപയും എക്സൈസ് പിടിച്ചെടുത്തു.
ലോക്‌സഭാ തിരഞ്ഞെടുപ്പിനോടനുബന്ധിച്ച് നടക്കുന്ന പ്രത്യേക ഡ്രൈവിന്റെ ഭാഗമായി തിരൂരങ്ങാടി താലൂക്ക് മേഖലകളിൽ നിരീക്ഷണം ശക്തമാക്കുന്നതിനിടെയാണ് ഇവർ പിടിയിലായത്. ഒരാഴ്ച മുമ്പ് കൊളപ്പുറത്തു നിന്നും 106 കിലോഗ്രാം കഞ്ചാവുമായി രണ്ടു പാലക്കാട് സ്വദേശികളെ ലോറിസഹിതം തിരൂരങ്ങാടി എക്സൈസ് സർക്കിൾ ഇൻസ്പെക്ടറും സംഘവും പിടികൂടിയിരുന്നു.
പിടിയിലായവർ തിരൂരങ്ങാടി താലൂക്കിലെ വിവിധ ഭാഗങ്ങളിലേക്ക് കഞ്ചാവ് എത്തിക്കുന്നതിൽ പ്രധാനികളാണ്. പ്രതികളെ പരപ്പനങ്ങാടി ഒന്നാംക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. എക്സൈസ് സർക്കിൾ ഇൻസ്പെക്ടർ മധുസൂദനൻ പിള്ള, അസിസ്റ്റൻറ് എക്സൈസ് ഇൻസ്പെക്ടർ കെ.എസ്. സുർജിത്, പി. പ്രഗേഷ്, പ്രിവന്റീവ് ഓഫീസർ രജീഷ്, ദിലീപ് കുമാർ, സിവിൽ എക്സൈസ് ഓഫീസർമാരായ കെ. ശിഹാബുദ്ദീൻ, യൂസഫ്, അഭിലാഷ് ചിറ്റടിമംഗലത്ത് തുടങ്ങിയവരും പങ്കെടുത്തു.