വേങ്ങര: വേങ്ങര സാംസ്കാരിക വേദി സബാഹ് സ്ക്വയറിൽ സംഘടിപ്പിച്ച പത്മശ്രീ കെ.വി റാബിയ അനുസ്മരണ ചടങ്ങ് ശ്രദ്ധേയമായി. സാമൂഹിക പ്രവർത്തകയും എഴുത്തുകാരിയുമായിരുന്ന കെ.വി. റാബിയയുടെ ഓർമ്മകൾക്ക് മുന്നിൽ പ്രണാമം അർപ്പിച്ചുകൊണ്ട് തുടങ്ങിയ പരിപാടിയിൽ സാമൂഹിക പ്രവർത്തകൻ ചാലിൽ ബഷീർ മമ്പുറം അനുസ്മരണ പ്രഭാഷണം നടത്തി.
വേങ്ങര സാംസ്കാരിക വേദിയുടെ നേതൃത്വത്തിൽ നടന്ന അനുസ്മരണ ചടങ്ങിൽ വേങ്ങരയിലെ കലാ - സാഹിത്യ - സാംസ്കാരിക രംഗത്തുള്ളവർ കെ.വി. റാബിയയുടെ ജീവിതത്തെയും പ്രവർത്തനങ്ങളെയും കുറിച്ച് സംസാരിച്ചു.
വിദ്യാഭ്യാസം, സാമൂഹിക സേവനം, സ്ത്രീ ശാക്തീകരണം എന്നീ മേഖലകളിൽ അവർ നൽകിയ സംഭാവനകൾ സദസ്സിന് പ്രചോദനമായി. ശാരീരിക വെല്ലുവിളികളെ അതിജീവിച്ച് സമൂഹത്തിന് വെളിച്ചം പകർന്ന കെ.വി. റാബിയയുടെ ജീവിതം എല്ലാവർക്കും മാതൃകയാണെന്ന് സംസാരിച്ചവർ ചൂണ്ടിക്കാട്ടി.
ചടങ്ങിൽ വേങ്ങര സാംസ്കാരിക വേദി അംഗങ്ങളും പ്രാദേശിക രാഷ്ട്രീയ സാമൂഹിക സാംസ്കാരിക രംഗങ്ങളിലെ ഏതാനും ആളുകളും പങ്കെടുത്തു. കെ.വി. റാബിയയുടെ സ്മരണ നിലനിർത്തുന്നതിനും അവരുടെ ആശയങ്ങൾ പ്രചരിപ്പിക്കുന്നതിനും ഇത്തരം അനുസ്മരണ ചടങ്ങുകൾക്ക് വലിയ പ്രാധാന്യമുണ്ടെന്ന് ചടങ്ങ് വിലയിരുത്തി.