റോഡിൽ ഡ്രൈവിങ്ങിനിടെ എന്തെല്ലാം സിഗ്നലുകൾ ഉപയോഗിക്കണം എന്നത് സംബന്ധിച്ചും സൈൻ ബോർഡുകൾ പാലിക്കേണ്ടത് എങ്ങനെയെന്നത് സംബന്ധിച്ചുമെല്ലാം അറിവില്ലാത്തവരാണ് വലിയൊരു വിഭാഗം ഡ്രൈവർമാരും. വാഹനത്തിലെ ഹസാർഡ് ലൈറ്റുകളുടെ ഉപയോഗത്തെ കുറിച്ചുള്ള അജ്ഞതയാണ് അതിലൊന്ന്. പെരുമഴയത്തും മൂടൽ മഞ്ഞിലും വാഹനത്തിലെ നാല് ഇൻഡിക്കേറ്റർ ലൈറ്റുകളും മിന്നിക്കൊണ്ടിരിക്കുന്ന ഹസാർഡ് ലൈറ്റ് ഉപയോഗിക്കുന്നത് നമ്മൾക്ക് കാണാം. ഇത് ശരിയായ രീതിയാണോ? ഹസാർഡ് ലൈറ്റിന്റെ ഉപയോഗത്തെ കുറിച്ച് നാട്ടുകാർക്കുള്ള അറിവ് പരിശോധിക്കുകയാണ് കേരള പോലീസ്.
അതിന്റെ ഭാഗമായി 'ഹസാർഡ് ലൈറ്റ് ഉപയോഗിക്കേണ്ടത് എപ്പോൾ? എന്ന് ചോദിക്കുന്ന ഒരു പോസ്റ്റ് സമൂഹമാധ്യമങ്ങളിൽ പങ്കുവെച്ചിരിക്കുകയാണ് പോലീസ്.
വാഹനത്തിലെ ഹസാർഡ് ലൈറ്റുകളെന്താണെന്നും അവയുടെ ഉപയോഗം എന്താണെന്നും എപ്പോഴൊക്കെയാണ് ഇത് പ്രവർത്തിപ്പിക്കേണ്ടതെന്നുമൊക്കെ പലർക്കും നിശ്ച്ചയമില്ലെന്ന് പോലീസ് പറയുന്നു.. വാഹനത്തിന്റെ നാല് ടേർണിംഗ് ഇൻഡിക്കേറ്ററുകളും ഒരുമിച്ച് പ്രവർത്തിപ്പിക്കുന്നതിനെയാണ് ഹസാർഡ് വാർണിംഗ് ലൈറ്റ് എന്ന് പറയുന്നത്. വാഹനത്തിലെ ഡാഷ് ബോർഡിലുള്ള ചുവന്ന സ്വിച്ച് (Triangle symbol) ആണ് ഹസാർഡ് വാർണിംഗ് ലൈറ്റിനെ പ്രവർത്തിപ്പിക്കുന്നത്. എന്നാൽ നമ്മുടെ പൊതുനിരത്തുകളിൽ കണ്ടുവരുന്ന തെറ്റിദ്ധാരണയുണ്ടാക്കുന്ന പ്രവണതയാണ് ഹസാർഡ് വാർണിംഗ് ലൈറ്റിന്റെ ദുരുപയോഗമെന്ന് പോലീസ് പറഞ്ഞു. എപ്പോഴാണ് ഹസാർഡ് ലൈറ്റ് ഉപയോഗിക്കേണ്ടതെന്നും പോലീസ് ഫേസ്ബുക്ക് പോസ്റ്റിൽ വിശദീകരിച്ചു.
എപ്പോഴാണ് ഹസാർഡ് ലൈറ്റ് ഉപയോഗിക്കേണ്ടത് ?
യാത്രയ്ക്കിടെ റോഡിൽ വാഹനം നിർത്തേണ്ട അടിയന്തര സാഹചര്യമുണ്ടായാൽ മാത്രം പുറകെ വരുന്ന വാഹനങ്ങൾക്ക് സൂചന നൽകുന്നതിനാണ് ഹസാർഡ് വാർണിംഗ് ലൈറ്റ് ഉപയോഗിക്കേണ്ടത്.
ലൈൻ മാറ്റം, തിരിവുകൾ തുടങ്ങിയ മറ്റ് അവസരങ്ങളിൽ ഈ സിഗ്നൽ ഉപയോഗിക്കുന്നത് പുറകെ വരുന്ന വാഹനങ്ങളിലെ ഡ്രൈവർമാർക്ക് ആശയക്കുഴപ്പമുണ്ടാക്കും.
പലരും റോഡുകൾ ചേരുന്ന ജംഗ്ഷനുകളിൽ നേരെ പോകുന്നതിനായി ഹസാർഡ് വാർണിംഗ് ലൈറ്റ് ഉപയോഗിക്കരുത്.
നിരത്തുകളിൽ ഹസാർഡ് വാർണിംഗ് ലൈറ്റ് പ്രവർത്തിപ്പിച്ച വാഹനത്തെ കണ്ടാൽ അത് നിർത്തിയിട്ടിരിക്കുകയാണെന്ന് മനസിലാക്കി വേണ്ട മുൻകരുതലുകൾ സ്വീകരിക്കുക.
തിരക്കുപിടിച്ച റോഡിലൂടെ ഒരു വാഹനത്തിന് പതിയെ പോകേണ്ട സാഹചര്യമുണ്ടായാൽ (ഭാരം കയറ്റിയ വാഹനങ്ങൾ, മറ്റൊരു വാഹനത്തെ കെട്ടിവലിച്ചു കൊണ്ടുപോകുന്ന വാഹനങ്ങൾ) ഹസാഡ് വാണിങ്ങ് പ്രവർത്തിപ്പിക്കാം.
മോട്ടോർ വാഹന നിയമപ്രകാരം വാഹനം ഓടിക്കുമ്പോൾ ഒരിക്കലും ഹസാഡ് ലൈറ്റ് പ്രവർത്തിപ്പിക്കരുത്
എന്നാൽ നിങ്ങളുടെ വാഹനംകെട്ടി വലിച്ചുകൊണ്ടു പോകുമ്പോൾ ഹസാർഡ് ലൈറ്റ് ഉപയോഗിക്കാം.
മഴയുള്ളപ്പോഴും, മൂടൽ മഞ്ഞുള്ളപ്പോഴും ഹസാഡ് പ്രവർത്തിപ്പിക്കരുത്.