വി കെ പടി മമ്പുറം റോഡിൽ റോഡിലേക്ക് വളഞ്ഞു നിൽക്കുന്ന വൃക്ഷങ്ങളും തെങ്ങുകളും യാത്രക്കാരിൽ ഭീതി വർധിപ്പിക്കുന്നു. പലപ്പോഴും ഉയരമുള്ള തെങ്ങുകളിൽ നിന്ന് തേങ്ങകളും ഓലകളും വീഴുന്നത് നടു റോഡിലേക്കാണ്. നല്ല കാറ്റടിക്കുമ്പോൾ ഈ തെങ്ങുകൾ തന്നെ റോഡിലേക്ക് മുറിഞ്ഞു വീഴുന്ന രീതിയിൽ ആടിയുലയുമ്പോൾ ഏത് നിമിഷവും ഒരു വൻ അപകടം സംഭവിച്ചേക്കാമെന്ന പേടിയാണ് പരിസര വാസികളിൽ ഉൾപ്പടെ ഉണ്ടാകുന്നത്. നൂറു കണക്കിന് വാഹനങ്ങളും കാൽ നട യാത്രക്കാരും കടന്നു പോകുന്ന ഈ റോഡിനെ കുറിച്ച് യാത്രക്കാരിലും പ്രദേശ വാസികളിലും നിർഭയത്വം ഉണ്ടായിരിക്കേണ്ടത് അനിവാര്യമാണ്. വൈദ്യുത ലൈനിലേക്കും മറ്റും മരവും ചില്ലകളും വീണ് നാശനഷ്ടം സംഭവിക്കുന്നതും ഈ ഭാഗത്ത് കൂടി വരികയാണ്. അപകടകരമാം വിധം വളർന്നു നിൽക്കുന്ന മരങ്ങളും തെങ്ങുകളും വെട്ടി മാറ്റാൻ അധികൃതർ ശ്രദ്ധിക്കണമെന്നും വി. പി സിംഗ് ഫൗണ്ടേഷൻ ജില്ല കമ്മിറ്റി ആവശ്യപ്പെട്ടു. ജില്ല ചെയർമാൻ ഷംസു വരമ്പനാലുങ്ങൽ അധ്യക്ഷത വഹിച്ചു.