മൊറയൂർ: അരിമ്പ്ര മലയിലെ വിനോദ സഞ്ചാര കേന്ദ്രമായ മിനി ഊട്ടിയിൽ പ്ലാസ്റ്റിക് മാലിന്യം തള്ളിയ സംഭവത്തിൽ കൊണ്ടോട്ടി പൊലിസ് കേസെടുത്തു.
മൊറയൂർ പഞ്ചായത്ത് സെക്രട്ടറിയുടെ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്. ഭാരതീയ ന്യായ സംഹിത (ബി. എൻ. എസ്) 271, 272 (ജീവന് ഭീഷണിയാവുന്ന പകർച്ചവ്യാധി പരത്തൽ), 280 (ആരോഗ്യത്തിന് ഹാനികരമായ വിധത്തിൽ പരിസ്ഥിതി മലിനീകരണം) എന്നീ വകുപ്പുകളടക്കം ചുമത്തിയാണ് കേസെടുത്തത്.
മിനി ഊട്ടിയിലെ റോഡ് സൈഡിൽ സ്വകാര്യ വ്യക്തിയുടെ സ്ഥലത്ത് രണ്ട് സ്ഥലങ്ങളിലായി മാലിന്യം നിഷേപിച്ചിട്ടുണ്ടെന്ന് പൊലിസ് എഫ്.ഐ.ആറിൽ വ്യക്തമാക്കുന്നു. അതേ സമയം കോഴിക്കോട് കോർപറേഷനിലെയും ഈരാറ്റുപേട്ട നഗരസഭയിലെയും ഹരിത കർമ സേനയിൽ നിന്നും ഏജൻസികൾ ശേഖരിച്ച അജൈവ മലിന്യമാണ് മിനി ഊട്ടിയിൽ കൊണ്ടു വന്ന് തള്ളിയതെന്ന് മൊറയൂർ പഞ്ചായത്ത് സെക്രട്ടറി തദ്ദേശ സ്വയംഭരണ വകുപ്പ് ജോ. ഡയരക്ടർക്കും, ജില്ലാ ശുചിത്വ മിഷൻ കോർഡിനേറ്റർക്കും സമർപ്പിച്ച റിപ്പോർട്ടിൽ വ്യക്തമാക്കുന്നുണ്ട്.
മിനി ഊട്ടിയിൽ അജൈവ മാലിന്യം തള്ളിയത്തിന് പിന്നാലെ ഇതു പോലുള്ള കൂടുതൽ പരാതികളെത്തുന്നു. മലപ്പുറം നഗരസഭ അതിർത്തിയായ കൊളായിൽ സ്വകാര്യ വ്യക്തിയുടെ സ്ഥലത്ത് സമാന രീതിയിൽ മാലിന്യം തള്ളി. 15 ന് അർധ രാത്രിക്ക് ശേഷം തന്റെ ഉടമസ്ഥതയിലുള്ള സ്ഥലത്ത് മാലിന്യം തള്ളിയതായി പൂക്കോട്ടൂർ മുണ്ടിത്തൊടിക സ്വദേശി കെ. റിയാസ് മലപ്പുറം പൊലിസിൽ പരാതി നൽകി.
നഗരസഭയിലെ മൂന്നാം വാർഡിൽ ഉൾപ്പെട്ട ആലത്തൂർ പടി - മാര്യാട് റോഡിലെ കൊളായി അൽ അബീർ ആശുപത്രിക്ക് സമീപം ആളൊഴിഞ്ഞ പറമ്പിലാണ് മാലിന്യം തള്ളിയത്. വാർഡ് കൗൺസിലറുടെ പരാതിയെത്തുടർന്ന് നഗരസഭ ആരോഗ്യ വിഭാഗം സംഭവ സ്ഥലം സന്ദർശിച്ചിരുന്നു. മാലിന്യം തള്ളിയതിൽ മലപ്പുറം നഗരസഭ അധികൃതർ ഇന്ന് പൊലിസിൽ പരാതി നൽകും.
കഴിഞ്ഞ 15 നു പുലർച്ചെ 2.17 ഓടെ നമ്പർ പ്ലേറ്റ് മറച്ച ലോറി മാര്യാട് നിന്നും കൊളായി റോഡിൽ പ്രവേശിക്കുന്നതായി അവിടെയുള്ള സി.സി.ടി.വി ദൃശ്യങ്ങളിലുണ്ട്. ഫുൾ ലോഡുമായി മുകളിൽ ടാർപ്പായ വിരിച്ച വാഹനം തിരികെ ആലത്തൂർപടിയിലെത്തുന്നത് ഒരു മണിക്കൂറിനു ശേഷം. അപ്പോഴുള്ള ദൃശ്യങ്ങളിൽ വാഹനത്തിൽ ലോഡ് പകുതിയായതായി കാണുന്നു. ചാക്കുകളിൽ കെട്ടിയ മാലിന്യം ലോറിയിൽ നിന്ന് എടുത്തെറിയുകയായിരുന്നു വെന്ന് പ്രദേശ വാസികൾ പറയുന്നു. ആലത്തൂർ പടിയിലെത്തിയ വാഹനം മലപ്പുറം ഭാഗത്തേക്കാണ് പോയത്. മിനി ഊട്ടിയിലും മാലിന്യം തള്ളിയത് ഈ ലോറിയണെന്ന് സംശയവുമുണ്ട്.