ജില്ലയിൽ ജാപ്പനീസ് എൻസഫലൈറ്റിസ് (JE) അഥവാ മസ്തിഷ്കജ്വരം പ്രതിരോധിക്കുന്നതിനായി ആരോഗ്യവകുപ്പിന്റെ നേതൃത്വത്തിൽ വിപുലമായ വാക്സിനേഷൻ ക്യാമ്പയിൻ ആരംഭിക്കുന്നു.
ഒന്നു മുതൽ 15 വയസ്സുവരെയുള്ള 14,79,497 കുട്ടികൾക്കാണ് ജില്ലയിൽ സൗജന്യമായി പ്രതിരോധ മരുന്ന് നൽകുന്നത്. ഉദ്ഘാടനം തവനൂരിൽ.
ക്യമ്പയിന്റെ ജില്ലാതല ഉദ്ഘാടനം 2026 ജനുവരി 12-ന് രാവിലെ 10 മണിക്ക് തവനൂർ കേളപ്പജി മെമ്മോറിയൽ ഹൈസ്കൂളിൽ വെച്ച് നടക്കും.
ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ പി.കെ. അസ് ലു ഉദ്ഘാടന കർമ്മം നിർവ്വഹിക്കും.
മരണനിരക്ക് 30 ശതമാനം; രോഗം അതീവ അപകടകാരി
കൊതുകുകൾ വഴി പകരുന്ന വൈറസ് രോഗമായ ജാപ്പനീസ് എൻസഫലൈറ്റിസ് അതീവ ജാഗ്രത അർഹിക്കുന്ന ഒന്നാണ്. രോഗം ബാധിക്കുന്നവരിൽ 30 ശതമാനം പേർ മരണപ്പെടാനും, രക്ഷപ്പെടുന്നവരിൽ 50 ശതമാനത്തോളം പേർക്ക് കാഴ്ചശക്തി നഷ്ടപ്പെടുകയോ തളർവാതം സംഭവിക്കുകയോ പോലുള്ള സ്ഥിരമായ വൈകല്യങ്ങൾ ഉണ്ടാകാനും സാധ്യതയുണ്ട്.
കഴിഞ്ഞ അഞ്ച് വർഷത്തിനിടെ മലപ്പുറം ജില്ലയിൽ 126 പേർക്ക് മസ്തിഷ്കജ്വരം ബാധിക്കുകയും 27 പേർക്ക് ജീവൻ നഷ്ടമാവുകയും ചെയ്തിട്ടുണ്ട്.
സൗജന്യ വാക്സിനേഷൻ ഭാരത് ബയോടെക് വികസിപ്പിച്ച 'Jenvac' എന്ന വാക്സിനാണ് ക്യാമ്പയിന്റെ ഭാഗമായി നൽകുന്നത്. സ്വകാര്യ ആശുപത്രികളിലും മറ്റും 700 രൂപയോളം വിലവരുന്ന ഈ വാക്സിൻ സർക്കാർ മുഖേന പൂർണ്ണമായും സൗജന്യമായാണ് വിതരണം ചെയ്യുന്നത്.
ആദ്യഘട്ടത്തിൽ സ്കൂളുകൾ, അങ്കണവാടികൾ എന്നിവ കേന്ദ്രീകരിച്ചായിരിക്കും വിതരണം. തുടർന്ന് ഇത് കുട്ടികളുടെ പതിവ് വാക്സിനേഷൻ (Routine Immunisation) പട്ടികയിൽ ഉൾപ്പെടുത്തും.
രോഗലക്ഷണങ്ങൾ:
* തീവ്രമായ പനി
* കഠിനമായ തലവേദന
* ഛർദ്ദി
* ബോധക്ഷയം
* അസ്വാഭാവിക പെരുമാറ്റം
രോഗപ്രതിരോധത്തിനായി പരിസര ശുചിത്വം പാലിക്കണമെന്നും കൊതുകു നശീകരണം ഉറപ്പാക്കണമെന്നും ജില്ലാ മെഡിക്കൽ ഓഫീസർ (DMO) അറിയിച്ചു. നിശ്ചിത പ്രായപരിധിയിലുള്ള എല്ലാ കുട്ടികൾക്കും വാക്സിൻ നൽകി ഈ പ്രതിരോധ യജ്ഞത്തോട് മാതാപിതാക്കൾ പൂർണ്ണമായി സഹകരിക്കണമെന്ന് അധികൃതർ അഭ്യർത്ഥിച്ചു.