മുണ്ടക്കൈ- ചുരല്മല ദുരന്തബാധിതരുടെ പുനരധിവാസ പദ്ധതിയുടെ ഭാഗമായി നിര്മ്മിച്ച വയനാട് ടൗണ്ഷിപ്പിലെ വീടുകളില് താമസിക്കുന്ന ഗുണഭോക്താക്കള്ക്ക് സാധന സാമഗ്രികള് വാങ്ങുന്നതിന് ഒരു ലക്ഷം രൂപ വീതം അനുവദിക്കും. മുഖ്യമന്ത്രിയുടെ ദുരിതാശ്വാസ നിധിയില് നിന്നാണ് തുക നല്കുക. സാധനങ്ങള് വാങ്ങുന്നതിന്റെ ബില്ല് സമര്പ്പിക്കുന്നതിനനുസരിച്ചാണ് തുക കൈമാറുക. വെള്ളിയാഴ്ച ചേര്ന്ന മന്ത്രിസഭായോഗത്തിലാണ് ഇതു സംബന്ധിച്ച തീരുമാനം ഉണ്ടായത്.
കേരളത്തിലെ പട്ടയഭൂമി മറ്റാവശ്യങ്ങള്ക്കായി ഉപയോഗിക്കുന്നതിനും മന്ത്രിസഭായ യോഗം അനുമതി നല്കിയുട്ടുണ്ട്. വിവിധ ആവശ്യങ്ങള്ക്കായി ഭൂമി വിനിയോഗിക്കുന്നതിനുള്ള കേരള ഭൂമിപതിവ് (പട്ടയ ഭൂമി മറ്റ് ആവശ്യങ്ങള്ക്കായി ഉപയോഗിക്കുന്നതിനുള്ള അനുമതി നല്കല്) ചട്ടങ്ങള് 2026 രൂപീകരിക്കുന്നതിന് മന്ത്രിസഭായോഗം അനുമതി നല്കി.
വീടുകള്, കാര്ഷിക, വിദ്യാഭ്യാസ ആവശ്യങ്ങള്ക്ക് നിര്മ്മിക്കുന്ന കെടിടങ്ങള്, മാര്ക്കറ്റുകള്, ആരാധനാലയങ്ങള്, പൊതു ആവശ്യങ്ങള്ക്കുള്ള നിര്മ്മിതികള്, സാംസ്ക്കാരിക സ്ഥാപനങ്ങള്, ക്ലബുകള്, ചാരിറ്റബിള് ആവശ്യങ്ങള്ക്കുള്ള നിര്മിതികള് എന്നിവയ്ക്കുള്ള ഫീസ് ഒഴിവാക്കും.