വേങ്ങര: എസ്.എസ്.എൽ.സി പരീക്ഷയിൽ തിളക്കമാർന്ന വിജയഗാഥ തുടർന്ന് ചിനക്കൽ കുറുക ഗവൺമെന്റ് ഹൈസ്കൂൾ. ഈ വർഷം പരീക്ഷയെഴുതിയ 129 വിദ്യാർത്ഥികളും ഉന്നതപഠനത്തിന് അർഹത നേടിയതോടെ സ്കൂളിന് തുടർച്ചയായ പതിനൊന്നാം വർഷവും 100 ശതമാനം വിജയം സ്വന്തമാക്കാനായി.
മികച്ച ഗുണനിലവാരത്തോടെയുള്ള വിജയമാണ് ഇത്തവണയും സ്കൂൾ കാഴ്ചവെച്ചിരിക്കുന്നത്. വിജയികളിൽ 14 വിദ്യാർത്ഥികൾ എല്ലാ വിഷയങ്ങളിലും എ പ്ലസ് (Full A+) കരസ്ഥമാക്കിയപ്പോൾ, 7 വിദ്യാർത്ഥികൾ 9 വിഷയങ്ങളിൽ എ പ്ലസ് നേടി മികച്ച പ്രകടനം കാഴ്ചവെച്ചു.
PTA/SMC കമ്മിറ്റി, നാട്ടുകാർ, രക്ഷാകർത്താക്കൾ, അധ്യാപകർ എന്നിവരുടെ ഫലപ്രദവും നിരന്തരവുമായ ഇടപെടലുകളാണ് സ്കൂളിന്റെ ഈ വിജയക്കുതിപ്പിന് പിന്നിലെന്ന് വിലയിരുത്തപ്പെടുന്നു. പഠന പിന്തുണ ആവശ്യമായ കുട്ടികൾക്കായി പ്രത്യേക പരിശീലന പരിപാടികളും പഠനക്ലാസുകളും സ്കൂൾ അധികൃതർ മുൻകൂട്ടി ആസൂത്രണം ചെയ്ത് നടപ്പാക്കുകയുണ്ടായി.
നൂറു ശതമാനം വിജയത്തിന് വേണ്ടി കഠിനപ്രയത്നം നടത്തിയ വിദ്യാർത്ഥികളെയും അതിന് നേതൃത്വം നൽകിയ അധ്യാപകരെയും പി.ടി.എ പ്രസിഡന്റ് ശ്രീ. ജലീൽ പൂക്കുത്ത് അഭിനന്ദിച്ചു. വരും വർഷങ്ങളിലും ഈ മികവ് നിലനിർത്താൻ ആവശ്യമായ എല്ലാ പിന്തുണയും PTA/SMC യുടെ ഭാഗത്തുനിന്ന് ഉണ്ടാകുമെന്ന് അദ്ദേഹം അറിയിച്ചു. മികച്ച വിജയം കൈവരിച്ച വിദ്യാർത്ഥികൾക്കായി സ്കൂൾ തലത്തിൽ വിപുലമായ അനുമോദന ചടങ്ങ് സംഘടിപ്പിക്കുമെന്നും അധികൃതർ അറിയിച്ചു.