വേങ്ങര: സംസ്ഥാന പൊതുവിദ്യാഭ്യാസ വകുപ്പിന്റെ കഴിഞ്ഞ വർഷത്തെ പ്രവർത്തന മികവിനുള്ള ‘എ ഗ്രേഡ്’ അംഗീകാരം കുറ്റൂർ നോർത്ത് കെ.എം.എച്ച്.എസ്.എസ്. ലിറ്റിൽ കൈറ്റ്സ് യൂണിറ്റ് സ്വന്തമാക്കി. ഒരു വർഷക്കാലം വിദ്യാലയത്തിൽ വിജയകരമായി നടപ്പിലാക്കിയ വൈവിധ്യമാർന്നതും മാതൃകാപരവുമായ ഐ.ടി അധിഷ്ഠിത പ്രവർത്തനങ്ങളാണ് യൂണിറ്റിനെ ഈ ഉന്നത നേട്ടത്തിന് അർഹമാക്കിയത്.
ലിറ്റിൽ കൈറ്റ്സിന്റെ പതിവ് തനത് പ്രവർത്തനങ്ങൾക്ക് പുറമെ, സമൂഹത്തിനും വിദ്യാർത്ഥികൾക്കും ഒരുപോലെ ഉപകാരപ്രദമായ നിരവധി പുതുമയാർന്ന പദ്ധതികളാണ് ഈ വർഷം യൂണിറ്റ് ഏറ്റെടുത്തു നടത്തിയത്. സ്വന്തം സ്കൂളിലെയും മറ്റ് വിദ്യാലയങ്ങളിലെയും ഭിന്നശേഷിക്കാരായ കുട്ടികൾക്കായി പ്രത്യേക ഐ.ടി പരിശീലനം നൽകാൻ യൂണിറ്റിന് സാധിച്ചു.
കൂടാതെ, ലിറ്റിൽ കൈറ്റ്സിലെ പൂർവ്വ വിദ്യാർത്ഥി നിർമ്മിച്ച റോബോട്ടിന്റെ പ്രദർശനം, റോബോട്ടിക് വർക്ക് ഷോപ്പ്, ഗെയിം ഡെവലപ്പിങ് എന്നിവയും യൂണിറ്റിന്റെ നേതൃത്വത്തിൽ സംഘടിപ്പിച്ചു. പത്താം ക്ലാസ് വിദ്യാർത്ഥികൾക്കായുള്ള റോബോട്ടിക് പരിശീലനം, രക്ഷിതാക്കൾക്കായുള്ള ബോധവൽക്കരണ ക്ലാസുകൾ, ലഹരിക്കെതിരെയുള്ള പോസ്റ്റർ നിർമ്മാണം, ഫ്രീ സോഫ്റ്റ്വെയർ ഇൻസ്റ്റലേഷൻ തുടങ്ങിയ വൈവിധ്യമാർന്ന പ്രവർത്തനങ്ങളാണ് സ്കൂളിനെ ഈ നേട്ടത്തിലേക്ക് നയിച്ചത്.
നിലവിൽ മൂന്നു ബാച്ചുകളിലായി 105 വിദ്യാർത്ഥികളാണ് ഈ ലിറ്റിൽ കൈറ്റ്സ് യൂണിറ്റിൽ സജീവമായി പ്രവർത്തിക്കുന്നത്. കൈറ്റ് മെന്റർമാരായ കെ.കെ. സുഹറ, പി. മായ എന്നിവരുടെ മികച്ച നേതൃത്വത്തിലാണ് സ്കൂൾ ഈ അഭിമാന നേട്ടം കൈവരിച്ചത്. അധ്യാപകരുടെയും വിദ്യാർത്ഥികളുടെയും രക്ഷിതാക്കളുടെയും കൂട്ടായ പ്രവർത്തനത്തിനുള്ള അംഗീകാരമാണ് ഈ എ ഗ്രേഡ് തിളക്കമെന്ന് സ്കൂൾ അധികൃതർ അറിയിച്ചു.