തിരുവനന്തപുരം: വയനാട് പ്രളയബാധിത മേഖലയിൽ വീടുകൾ നിർമ്മിച്ചു നൽകുന്നതിനായി ഒഐസിസി മലപ്പുറം ജില്ലാ കമ്മിറ്റി (ജിദ്ദ) സമാഹരിച്ച 8,40,000 രൂപ കെപിസിസി നേതാക്കളുടെ സാന്നിധ്യത്തിൽ കൈമാറി. ജിദ്ദയിൽ സംഘടിപ്പിച്ച 'ബിരിയാണി ചലഞ്ച്' വഴിയാണ് ഈ തുക സമാഹരിച്ചത്.
തിരുവനന്തപുരത്ത് നടന്ന ചടങ്ങിൽ കെപിസിസി വർക്കിംഗ് പ്രസിഡന്റും മന്ത്രിയുമായ എ.പി. അനിൽകുമാർ, മാത്യു കുഴൽനാടൻ എം.എൽ.എ എന്നിവർ ചേർന്ന് തുക ഏറ്റുവാങ്ങി. ഒഐസിസി മലപ്പുറം ജില്ലാ കമ്മിറ്റി പ്രസിഡന്റ് ഹുസൈൻ ചുള്ളിയോടിന്റെ നേതൃത്വത്തിലാണ് ചടങ്ങുകൾ നടന്നത്.
ചടങ്ങിൽ വൈസ് പ്രസിഡന്റ് അസീസ് ലാക്കൽ, മൈനോറിറ്റി കോൺഗ്രസ് മലപ്പുറം ജില്ലാ കമ്മിറ്റി സെക്രട്ടറി മുജീബ് പാക്കട (വെങ്കടങ്ങ്), മലപ്പുറം ജില്ലാ കമ്മിറ്റി എക്സിക്യൂട്ടീവ് അംഗങ്ങളായ ഹംസ ലാക്കൽ, ഷംസുദ്ദീൻ മേലാറ്റൂർ, ഡി.സി.സി സെക്രട്ടറി നാസർ തെന്നല എന്നിവർ സന്നിഹിതരായിരുന്നു.
തുടർന്ന് ഒഐസിസി നേതാക്കൾ വി.ഡി. സതീശൻ, നിലമ്പൂർ എം.എൽ.എ ആര്യാടൻ ഷൗക്കത്ത് തുടങ്ങിയ നേതാക്കളുമായി കൂടിക്കാഴ്ച നടത്തി. ഈ ജീവകാരുണ്യ പ്രവർത്തനത്തിൽ പങ്കാളികളായ മുഴുവൻ ഒഐസിസി പ്രവർത്തകർക്കും നേതാക്കൾക്കും ജിദ്ദയിലെ പൊതുസമൂഹത്തിനും നേതൃത്വം നന്ദിയും കടപ്പാടും അറിയിച്ചു. മികച്ച പ്രവർത്തനങ്ങൾ കാഴ്ചവെക്കുന്ന ഒഐസിസി ജിദ്ദ മലപ്പുറം ജില്ലാ കമ്മിറ്റിയെ പ്രമുഖ നേതാക്കൾ അഭിനന്ദിച്ചു.
പ്രവാസി പ്രശ്നങ്ങൾ മുഖ്യമന്ത്രിയുടെ ശ്രദ്ധയിൽപ്പെടുത്തി
ചടങ്ങിനിടയിൽ നോർക്ക ക്ഷേമനിധിയിൽ നിന്നുള്ള പ്രവാസി പെൻഷൻ വൈകുന്നതും, നോർക്ക കെയർ ഇൻഷുറൻസ് എല്ലാ ആശുപത്രികളിലും ലഭ്യമാവാത്തതുമായ പ്രധാന പ്രശ്നങ്ങൾ നേതാക്കൾ അധികാരികളുടെ ശ്രദ്ധയിൽപ്പെടുത്തി. വിഷയത്തിൽ ഉചിതമായ നടപടികൾ കൈക്കൊള്ളാമെന്ന് അധികൃതർ ഉറപ്പുനൽകി.
ഈ സൽകർമ്മത്തിൽ സഹകരിച്ച എല്ലാവർക്കും ഒഐസിസി മലപ്പുറം ജില്ലാ കമ്മിറ്റി ജിദ്ദ ഘടകം പ്രസിഡന്റ് ഇൻ ചാർജ്ജ് അസീസ് ലാക്കൽ നന്ദി രേഖപ്പെടുത്തി.