വേങ്ങര: വേങ്ങര ഗവൺമെന്റ് വൊക്കേഷണൽ ഹയർസെക്കൻഡറി സ്കൂളിന് സമീപം റോഡരികിൽ കൂട്ടിയിട്ടിരിക്കുന്ന ഉപയോഗശൂന്യമായ പഴയ വാഹനങ്ങൾ എത്രയും വേഗം നീക്കം ചെയ്യണമെന്ന് ആവശ്യപ്പെട്ട് ഊരകം പഞ്ചായത്ത് മുസ്ലിം യൂത്ത് ലീഗ് കമ്മിറ്റി വേങ്ങര പോലീസിന് നിവേദനം നൽകി.
റോഡരികിൽ അലക്ഷ്യമായി കിടക്കുന്ന തുരുമ്പെടുത്ത വാഹനങ്ങൾ വിദ്യാർത്ഥികൾക്കും പൊതുജനങ്ങൾക്കും നടന്നുപോകുന്നതിന് വലിയ പ്രയാസമാണ് സൃഷ്ടിക്കുന്നത്. ഇത് പ്രദേശത്ത് കടുത്ത സുരക്ഷാഭീഷണി ഉയർത്തുന്നുണ്ടെന്നും നിവേദനത്തിൽ ചൂണ്ടിക്കാണിക്കുന്നു. പ്രദേശത്തിന്റെ ശുചിത്വത്തെയും സുഗമമായ ഗതാഗതത്തെയും ഈ സാഹചര്യം പ്രതികൂലമായി ബാധിക്കുന്നുണ്ട്.
പൊതുജനങ്ങളുടെയും വിദ്യാർത്ഥികളുടെയും യാത്രാസൗകര്യവും സുരക്ഷയും മുൻനിർത്തി അടിയന്തര നടപടി സ്വീകരിക്കണമെന്നാണ് യൂത്ത് ലീഗിന്റെ ആവശ്യം. നിവേദന സമർപ്പണ ചടങ്ങിൽ പഞ്ചായത്ത് മുസ്ലിം യൂത്ത് ലീഗ് പ്രസിഡന്റ് കെ.ടി. ഹംസ, ജനറൽ സെക്രട്ടറി എൻ. ജസീം, വൈസ് പ്രസിഡന്റുമാരായ ടി.വി. സജീർ, വി.കെ. മൂസ, കെ.കെ. ഇല്യാസ്, സെക്രട്ടറിമാരായ കെ. അഫ്സൽ, എം. യാസീൻ എന്നിവർ സംബന്ധിച്ചു.