വേങ്ങര : പാട്ട് പാടി വോട്ട് തേടുകയാണ് ഈ സ്വതന്ത്ര സ്ഥാനാർഥി. വേങ്ങര ഗ്രാമ പഞ്ചായത്തിലേക്ക് ഗാന്ധിക്കുന്ന് വാർഡിൽ നിന്നും ജനവിധി തേടുന്ന സ്വതന്ത്ര സ്ഥാനാർത്ഥി നസീമ തച്ചരുപടിക്കലാണ് പാട്ട് രൂപത്തിൽ വോട്ട് തേടുന്നത്. വോട്ടർമാരോട് വോട്ടഭ്യർത്ഥിക്കാൻ സ്വന്തമായി പാടിയ ഗാനവുമായി രംഗത്തെത്തിയ നസീമയുടെ പാട്ടും സോഷ്യൽ മീഡിയയിൽ വൈറലായി. 2015-20 കാലയളവിൽ ഗാന്ധിക്കുന്നിനെ പ്രതിനിധീകരിച്ചു ഇവർ വേങ്ങര ഗ്രാമ പഞ്ചായത്തിൽ മെമ്പർ ആയിരുന്നു. ഈ കാലയളവിലെ തൻ്റെ മാതൃകാപരമായ സേവനങ്ങളാണ് ഗാനത്തിലൂടെ അവർ അവതരിപ്പിക്കുന്നത്. സേവന രംഗത്ത് മികവ് തെളിയിച്ച നസീമ കലാരംഗത്തും മോശമല്ലെന്നു നാട്ടുകാർ പറയുന്നു. പാലിയേറ്റീവ് വളണ്ടിയർ, മെക് സെവൻ യോഗ ട്രെയിനർ തുടങ്ങിയ രംഗങ്ങളിലും ഇവർ സജീവമാണ്.