കണ്ണമംഗലം: അലിവ് ഫൗണ്ടേഷൻ ഫോർ കൾച്ചർ & ഹ്യൂമാനിറ്റിയുടെ കീഴിൽ കണ്ണമംഗലം പഞ്ചായത്തിൽ നടത്തുന്ന റമദാൻ ഫണ്ട് ശേഖരണ പ്രവർത്തനങ്ങൾക്ക് തുടക്കമായി. ഇതുമായി ബന്ധപ്പെട്ട് വിളിച്ചുചേർത്ത ആലോചനാ യോഗം വേങ്ങര നിയോജക മണ്ഡലം യൂത്ത് ലീഗ് സെക്രട്ടറി എ.കെ. നാസർ ഉദ്ഘാടനം ചെയ്തു.
റമദാൻ മാസത്തിൽ അശരണർക്കും പാവപ്പെട്ടവർക്കും കൈത്താങ്ങാവുക എന്ന ലക്ഷ്യത്തോടെയാണ് ഫണ്ട് സമാഹരണം സംഘടിപ്പിക്കുന്നത്.
കണ്ണമംഗലം പഞ്ചായത്ത് യൂത്ത് ലീഗ് പ്രസിഡന്റ് ജസീം അധ്യക്ഷത വഹിച്ച ചടങ്ങിൽ പ്രമുഖ പ്രാദേശിക നേതാക്കൾ സംബന്ധിച്ചു. പഞ്ചായത്ത് മുസ്ലീം ലീഗ് പ്രസിഡന്റ് പൂക്കുത്ത് മുജീബ്, ജനറൽ സെക്രട്ടറി ആബിദ് കൂന്തല എന്നിവർ റമദാൻ റിലീഫ് പ്രവർത്തനങ്ങളുടെ പ്രാധാന്യത്തെക്കുറിച്ച് സംസാരിച്ചു. ഫണ്ട് ശേഖരണം ഊർജിതമാക്കുന്നതിനും അർഹരായവരിലേക്ക് സഹായമെത്തിക്കുന്നതിനുമുള്ള കർമ്മപദ്ധതികൾ യോഗം ആസൂത്രണം ചെയ്തു.
യോഗത്തിൽ അദ്നാൻ പി., സൈദലവി, യൂസുഫലി, ഫൈസൽ തുടങ്ങിയവർ ആശംസകൾ നേർന്ന് സംസാരിച്ചു. പഞ്ചായത്തിലെ വിവിധ വാർഡുകളിൽ നിന്നുള്ള പ്രവർത്തകർ യോഗത്തിൽ പങ്കെടുത്തു. വരും ദിവസങ്ങളിൽ വീടുകളും സ്ഥാപനങ്ങളും കേന്ദ്രീകരിച്ച് ഫണ്ട് ശേഖരണം വിപുലപ്പെടുത്താനാണ് ഫൗണ്ടേഷന്റെ തീരുമാനം.