വേങ്ങര: കൊച്ചിയിലും തിരുവനന്തപുരത്തും ഊബറും റാപ്പിഡോയും കണ്ട് ചിരിക്കുകയാണ് വേങ്ങരക്കാർ. മൂന്ന് കിലോമീറ്ററിന് 25 രൂപയെന്നൊക്കെ കേൾക്കുമ്പോൾ വേങ്ങരയിലെ 'ലോക്കൽ' യാത്രക്കാർക്ക് പുച്ഛം മാത്രം. കാരണം, വേങ്ങരയിലെ ബ്ലോക്കിൽ ഒരു മൂന്ന് കിലോമീറ്റർ സഞ്ചരിക്കണമെങ്കിൽ ഊബറിന്റെ 25 രൂപ പോയിട്ട് ഒരു ഫുൾ ടാങ്ക് പെട്രോൾ അടിച്ചാലും തികയുമോ എന്നാണ് നാട്ടുകാരുടെ ചോദ്യം!
വേങ്ങര ബ്ലോക്ക്: ഒരു 'അതിജീവനം'
നഗരങ്ങളിലെ ഗതാഗതക്കുരുക്കിന് പരിഹാരമായാണ് ബൈക്ക് ടാക്സികൾ വരുന്നതെങ്കിൽ, വേങ്ങരയിലെ ബ്ലോക്കിന് മുന്നിൽ ഊബറും റാപ്പിഡോയും എഞ്ചിൻ ഓഫ് ചെയ്ത് കരഞ്ഞുപോകാൻ സാധ്യതയുണ്ട്.
• സ്കിൽ ടെസ്റ്റ്: വേങ്ങര ബ്ലോക്കിനിടയിലൂടെ വണ്ടി ഓടിക്കാൻ അറിയുന്നവനെ നേരിട്ട് നാസയിലേക്ക് അയക്കാമെന്നിരിക്കെ, 1000 രൂപ ബോണസ് കൊടുത്ത് ആരെങ്കിലും ഇങ്ങോട്ട് വരുമോ എന്നാണ് സോഷ്യൽ മീഡിയ ചോദിക്കുന്നത്.
• പാരലൽ സർവീസ്: നിലവിൽ വേങ്ങരയിൽ ബൈക്ക് ടാക്സി ഇല്ലെങ്കിലും, ബ്ലോക്കിൽ പെട്ടു കിടക്കുന്ന കാറിലിരിക്കുന്നവർക്ക് തൊട്ടടുത്ത ബൈക്കുകാരന്റെ പിന്നിൽ കയറി ഇരിക്കാവുന്ന 'ഫ്രീ സർവീസ്' പണ്ടും സജീവമാണെന്ന് നാട്ടുകാർ തമാശയാക്കുന്നു.
കമ്പനികൾ പേടിക്കുന്നത് എന്താണ്?
പ്രതിമാസം 35,000 രൂപ വരുമാനമൊക്കെ കൊച്ചിയിൽ നടക്കുമായിരിക്കും. എന്നാൽ വേങ്ങര ടൗണിൽ ഒരു പ്രാവശ്യം കുടുങ്ങിയാൽ തിരിച്ചിറങ്ങുമ്പോഴേക്കും അടുത്ത മാസത്തെ ശമ്പളത്തിന്റെ സമയമാകുമെന്ന് ബൈക്ക് ടാക്സി കമ്പനികൾക്ക് ഭയമുണ്ടോ എന്ന് സംശയിക്കേണ്ടിയിരിക്കുന്നു.
"വേങ്ങരയിൽ ഇതിന്റെ ആവശ്യം ഭയങ്കരമാണ്, കാരണം അത്രമാത്രമാണ് ഇവിടുത്തെ ട്രാഫിക് ബ്ലോക്ക്. പക്ഷെ ഒരു പേടിയുണ്ട്, ബൈക്ക് ടാക്സി വന്നാൽ ബ്ലോക്കിൽ കിടന്നു മടുത്ത് ഡ്രൈവർ വണ്ടി ഉപേക്ഷിച്ചു പോകുമോ എന്നാണ്!" - ഒരു സ്ഥിരം യാത്രക്കാരന്റെ രോദനം.
കൊച്ചിയിലെയും തിരുവനന്തപുരത്തെയും ബ്ലോക്കിനെതിരെ ബൈക്ക് ടാക്സി ഇറക്കുന്ന കമ്പനികൾ, വേങ്ങരയിലെ ട്രാഫിക് കണ്ടാൽ ആപ്പും പൂട്ടി സ്ഥലം വിടാൻ സാധ്യതയുണ്ട്. എങ്കിലും, ചുരുങ്ങിയ ചിലവിൽ വേങ്ങരയിലെ തിരക്കിൽ നിന്ന് രക്ഷപ്പെടാൻ ഒരു ബൈക്ക് ടാക്സി വന്നെങ്കിൽ എന്ന് ആഗ്രഹിക്കാത്തവരായി ആരുമില്ല.