കോട്ടക്കൽ: ഇന്ത്യൻ മെഡിക്കൽ അസോസിയേഷൻ (IMA) കോട്ടക്കൽ ബ്രാഞ്ചും വിമയും (WIMA) സംയുക്തമായി സംഘടിപ്പിക്കുന്ന ത്രിദിന നാടക പഠന കളരിക്ക് കോട്ടക്കലിൽ തുടക്കമായി. അധ്യാപക ഭവനിൽ വെച്ച് നടന്ന ചടങ്ങിൽ പ്രശസ്ത നടനും എഴുത്തുകാരനുമായ ഡോ. എ.കെ മുരളീധരൻ ക്യാമ്പ് ഉദ്ഘാടനം ചെയ്തു. കലയും സർഗ്ഗാത്മകതയും വ്യക്തിത്വ വികാസത്തിൽ വഹിക്കുന്ന പങ്കിനെക്കുറിച്ച് അദ്ദേഹം ഉദ്ഘാടന പ്രസംഗത്തിൽ സംസാരിച്ചു.
കോട്ടക്കൽ ഐ.എം.എ പ്രസിഡന്റ് ഡോ. അനിത സജീവ് അധ്യക്ഷത വഹിച്ച ചടങ്ങിൽ ഡോ. റജീന, ഡോ. പ്രമീള തുടങ്ങിയ പ്രമുഖർ ആശംസകൾ അർപ്പിച്ചു. ആരോഗ്യപ്രവർത്തകർക്കിടയിലെ കലാപരമായ അഭിരുചികളെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് ഈ സംയുക്ത സംരംഭം സംഘടിപ്പിച്ചിരിക്കുന്നത്.
മൂന്ന് ദിവസം നീണ്ടുനിൽക്കുന്ന പരിശീലന പരിപാടിയിൽ നാടക രംഗത്തെ പ്രഗത്ഭരായ വ്യക്തികൾ ക്ലാസ്സുകൾക്ക് നേതൃത്വം നൽകും. കോട്ടക്കൽ മുരളി, പ്രവീൺ കോട്ടക്കൽ, ഡോ. സന്തോഷ് വള്ളിക്കാട്, ബാബു കോഡൂർ, സഹീർ, ഡോ. എൻ. ബിജി എന്നിവരാണ് ക്യാമ്പിലെ വിവിധ സെഷനുകൾ നയിക്കുന്നത്. നാടകരചന, അഭിനയം, രംഗഭാഷ തുടങ്ങിയ വിഷയങ്ങളിൽ ക്യാമ്പ് അംഗങ്ങൾക്ക് പരിശീലനം നൽകും.