തിരുവനന്തപുരം: റെയിൽവേ ക്രോസുകളിൽ ഗേറ്റുകൾ അടയ്ക്കുമ്പോൾ നിയമം ലംഘിച്ച് വാഹനം ഓടിച്ചു കയറ്റുന്നവർക്കെതിരെ കർശന നടപടിയുമായി മോട്ടോർ വാഹന വകുപ്പ് (MVD). ഗേറ്റുകൾ അടച്ചുതുടങ്ങുമ്പോഴോ അടച്ചുകഴിഞ്ഞോ ഉള്ള അപകടകരമായ ‘നുഴഞ്ഞുകയറ്റം’ ശ്രദ്ധയിൽപ്പെട്ടാൽ ഡ്രൈവർമാരുടെ ലൈസൻസ് റദ്ദാക്കുന്നത് ഉൾപ്പെടെയുള്ള നടപടികൾ സ്വീകരിക്കുമെന്ന് വകുപ്പ് വ്യക്തമാക്കി.
റെയിൽവേ ക്രോസുകളിലെ സിഗ്നലുകൾ അവഗണിച്ചും, ഗേറ്റിനടിയിലൂടെ വാഹനം നൂഴ്ത്തിക്കടത്താൻ ശ്രമിച്ചും ഉണ്ടാകുന്ന അപകടങ്ങൾ വർധിച്ചുവരുന്ന സാഹചര്യത്തിലാണ് എംവിഡിയുടെ ഈ കർശന ഇടപെടൽ.
മോട്ടോർ വാഹന വകുപ്പ് ഉദ്യോഗസ്ഥർ നേരിട്ട് നടത്തുന്ന പരിശോധനകൾക്ക് പുറമെ, നിയമലംഘകരെ കണ്ടെത്താൻ വിപുലമായ സംവിധാനങ്ങളാണ് ഒരുക്കിയിരിക്കുന്നത്. റെയിൽവേ ഗേറ്റുകളിലെ സിസിടിവി ദൃശ്യങ്ങൾ ശേഖരിച്ച് നിയമലംഘനം നടത്തുന്ന വാഹനങ്ങളെ കണ്ടെത്തുകയും ഡ്രൈവർമാർക്കെതിരെ നടപടിയെടുക്കുകയും ചെയ്യും.
ഗേറ്റ് കീപ്പർമാരും മറ്റ് റെയിൽവേ ഉദ്യോഗസ്ഥരും നൽകുന്ന ഔദ്യോഗിക റിപ്പോർട്ടുകളുടെ അടിസ്ഥാനത്തിൽ ഡ്രൈവർമാരുടെ ലൈസൻസ് സസ്പെൻഡ് ചെയ്യും.
നിർദ്ദേശങ്ങൾ ലംഘിച്ച് അപകടമുണ്ടാക്കുന്ന ഡ്രൈവർമാരുടെ ലൈസൻസ് സ്ഥിരമായി റദ്ദാക്കുന്നത് ഉൾപ്പെടെയുള്ള നടപടികളിലേക്ക് വകുപ്പ് കടക്കും.
‘ആ മിനിറ്റുകൾ ജീവനെടുത്തേക്കാം’
ഒന്നോ രണ്ടോ മിനിറ്റുകൾ ലാഭിക്കാൻ വേണ്ടി ഡ്രൈവർമാർ കാട്ടുന്ന അമിതവേഗവും സാഹസികതയും സ്വന്തം ജീവനും മറ്റുള്ളവരുടെ ജീവനും ഒരുപോലെ ഭീഷണിയാണെന്ന് എംവിഡി ഓർമ്മിപ്പിച്ചു. ഗേറ്റ് അടയ്ക്കാൻ തുടങ്ങുമ്പോൾ തന്നെ വാഹനങ്ങൾ സുരക്ഷിതമായ അകലത്തിൽ നിർത്തണമെന്നും സിഗ്നലുകൾ കർശനമായി പാലിക്കണമെന്നും അധികൃതർ അറിയിച്ചു.
റെയിൽവേ ക്രോസുകളിലെ നിയമലംഘനങ്ങൾ തടയുന്നതിലൂടെ വലിയ ദുരന്തങ്ങൾ ഒഴിവാക്കാനാകുമെന്ന പ്രതീക്ഷയിലാണ് മോട്ടോർ വാഹന വകുപ്പിന്റെ ഈ പുതിയ നീക്കം.