തിരുവനന്തപുരം: സ്കൂൾ അധ്യയന വർഷാരംഭത്തിന് മുന്നോടിയായുള്ള ഫിറ്റ്നസ് പരിശോധനകൾ ഏകോപിപ്പിക്കുന്നതിനായി ജില്ലാതലത്തിൽ നോഡൽ ഓഫീസർമാരെ നിയമിക്കാൻ പൊതുവിദ്യാഭ്യാസ വകുപ്പ് തീരുമാനിച്ചു. വിവിധ വകുപ്പുകളുടെ സർട്ടിഫിക്കറ്റുകൾക്കായി പ്രധാനാധ്യപകർ നേരിടുന്ന കടുത്ത പ്രതിസന്ധി പരിഹരിക്കാനാണ് സർക്കാർ ഇടപെടൽ. ജില്ലാ കളക്ടറുടെ മേൽനോട്ടത്തിൽ കളക്ടറേറ്റ് കേന്ദ്രീകരിച്ചായിരിക്കും നോഡൽ ഓഫീസർമാരുടെ പ്രവർത്തനം.
കഴിഞ്ഞ അധ്യയന വർഷം കൊല്ലം തേവലക്കരയിൽ വിദ്യാർത്ഥി വൈദ്യുതാഘാതമേറ്റും മറ്റൊരു വിദ്യാർത്ഥി പാമ്പുകടിയേറ്റും മരിച്ചതടക്കമുള്ള ദൗർഭാഗ്യകരമായ സംഭവങ്ങളുടെ പശ്ചാത്തലത്തിലാണ് ഇത്തവണ ഫിറ്റ്നസ് പരിശോധനയ്ക്ക് കർശന നിബന്ധനകൾ ഏർപ്പെടുത്തിയത്. മുൻപ് തദ്ദേശ സ്ഥാപനങ്ങളിലെ അസിസ്റ്റന്റ് എഞ്ചിനീയർമാർ മാത്രം നടത്തിയിരുന്ന പരിശോധനയ്ക്ക് പകരം ഇത്തവണ ആറ് പ്രധാന വകുപ്പുകളുടെ പരിശോധന ഡി.പി.ഐ നിർബന്ധമാക്കിയിരുന്നു.
പരിശോധന നടത്തുന്ന പ്രധാന വിഭാഗങ്ങൾ:
• മെഡിക്കൽ ഓഫീസർ (ആരോഗ്യ വകുപ്പ്)
• അഗ്നിരക്ഷാ സേന (ഫയർ ഫോഴ്സ്)
• വനം വകുപ്പ്
• പഞ്ചായത്ത് എഞ്ചിനീയറിംഗ് വിഭാഗം
• ഗതാഗത വകുപ്പ് (മോട്ടോർ വാഹന വകുപ്പ്)
• സ്കൂൾ മോണിറ്ററിംഗ് കമ്മിറ്റി (പോലീസ് എസ്.എച്ച്.ഒ, പഞ്ചായത്ത് സെക്രട്ടറി എന്നിവരടങ്ങുന്നത്)
വിവിധ വകുപ്പുകളിൽ നിന്ന് സർട്ടിഫിക്കറ്റ് നേടാൻ പ്രധാനാധ്യപകർ അപേക്ഷ നൽകിയിരുന്നെങ്കിലും, വകുപ്പുകൾ തമ്മിലുള്ള ഏകോപനമില്ലായ്മ വലിയ പ്രതിസന്ധി സൃഷ്ടിച്ചിരുന്നു. തങ്ങൾക്ക് ഇത്തരമൊരു നിർദ്ദേശം ലഭിച്ചിട്ടില്ലെന്ന് പറഞ്ഞ് പല ഉദ്യോഗസ്ഥരും പരിശോധനയിൽ നിന്ന് ഒഴിഞ്ഞുമാറുന്നതായി ‘മാധ്യമം’ റിപ്പോർട്ട് ചെയ്തിരുന്നു. ഈ വാർത്തയെത്തുടർന്നാണ് അടിയന്തര നടപടിയുമായി വിദ്യാഭ്യാസ വകുപ്പ് രംഗത്തെത്തിയത്.
പുതിയ തീരുമാനപ്രകാരം, ജില്ലാതല നോഡൽ ഓഫീസർമാർ വിവിധ വകുപ്പുകളെ ഏകോപിപ്പിച്ച് ഓരോ സ്കൂളിലും നേരിട്ടെത്തി പരിശോധന ഉറപ്പാക്കും. ജൂൺ ഒന്നിന് സ്കൂൾ തുറക്കുന്നതിന് മുൻപായി എല്ലാ പരിശോധനകളും പൂർത്തിയാക്കി റിപ്പോർട്ട് സമർപ്പിക്കാനാണ് നിർദ്ദേശം. ഇതോടെ അധ്യയന വർഷത്തിന്റെ തുടക്കത്തിൽ തന്നെ കുട്ടികളുടെ സുരക്ഷ ഉറപ്പാക്കാൻ കഴിയുമെന്നാണ് വിദ്യാഭ്യാസ വകുപ്പിന്റെ പ്രതീക്ഷ.