വേങ്ങര: ജീവിതത്തിന്റെ സകല മേഖലകളിലും ഇസ്ലാമിന്റെ അന്തസ്സ് ഉയർത്തിപ്പിടിച്ച്, അല്ലാഹുവിന്റെ യഥാർത്ഥ അടിമകളായി മാറാനും അതുവഴി ഇഹപര വിജയം നേടാനും വിശ്വാസികൾ യത്നിക്കണമെന്ന് ഇമാം ഇ. വി. അബ്ദുൽ സലാം മൗലവി ആഹ്വാനം ചെയ്തു. വേങ്ങര ഡൗൺ ടൗൺ ജുമാ മസ്ജിദിൽ നടന്ന ബലി പെരുന്നാൾ നിസ്കാരത്തിന് ശേഷം ഖുതുബ പ്രസംഗം നടത്തുകയായിരുന്നു അദ്ദേഹം. ഏകനായ സൃഷ്ടാവിന്റെ ചിഹ്നങ്ങളെ മുറുകെപ്പിടിച്ചുകൊണ്ട് മുന്നോട്ട് പോകാൻ വിശ്വാസികൾ തയ്യാറാകണമെന്നും അദ്ദേഹം ഓർമ്മിപ്പിച്ചു.
രാവിലെ മുതൽ പെയ്ത ശക്തമായ മഴ കാരണം മുൻകൂട്ടി നിശ്ചയിച്ചിരുന്ന ഈദ് ഗാഹിന് പകരമായി പള്ളിയിൽ വെച്ചായിരുന്നു പെരുന്നാൾ നമസ്കാരം നിർവ്വഹിച്ചത്. പ്രതികൂല കാലാവസ്ഥയായിരുന്നിട്ടും സ്ത്രീകളും കുട്ടികളുമടക്കം വൻ ജനപങ്കാളിത്തം കൊണ്ട് പള്ളിയും പരിസരവും നിറഞ്ഞു കവിഞ്ഞിരുന്നു.
പ്രത്യേക ഈദ് പ്രാർത്ഥനകൾക്ക് ശേഷം വിശ്വാസികൾ പരസ്പരം ആശ്ലേഷിച്ചും ഈദ് ആശംസകൾ കൈമാറിയും സൗഹൃദം പുതുക്കി. നമസ്കാരത്തിന് ശേഷം പള്ളി കമ്മിറ്റിയുടെ നേതൃത്വത്തിൽ മധുരപലഹാര വിതരണവും നടന്നു. ഏറെ സന്തോഷത്തോടെയും ആത്മനിർവൃതിയോടെയുമാണ് വിശ്വാസികൾ പെരുന്നാൾ നമസ്കാരം പൂർത്തിയാക്കി മടങ്ങിയത്.