വേങ്ങര: രാത്രികാല സുരക്ഷയും സൗന്ദര്യവും ഉറപ്പുവരുത്തുന്നതിന്റെ ഭാഗമായി വേങ്ങര ടൗണിലെ കേടായ തെരുവ് വിളക്കുകൾ അടിയന്തരമായി നന്നാക്കണമെന്ന് ആവശ്യപ്പെട്ട് കേരള വ്യാപാരി വ്യവസായി ഏകോപന സമിതി (KVVES) വേങ്ങര യൂണിറ്റ് പഞ്ചായത്ത് അധികാരികൾക്ക് നിവേദനം നൽകി.
വേങ്ങര പഞ്ചായത്തിലെ അമ്മാഞ്ചേരി കാവ് മുതൽ ബ്ലോക്ക് റോഡ് വരെയുള്ള പ്രദേശങ്ങളിലെ സ്ട്രീറ്റ് ലൈറ്റുകൾ ഏറെക്കാലമായി പ്രവർത്തനരഹിതമാണ്. ഇത് രാത്രികാലങ്ങളിൽ ടൗണിനെ പൂർണ്ണമായും ഇരുട്ടിലാക്കുന്നതായും യാത്രക്കാർക്കും വ്യാപാരികൾക്കും ഒരുപോലെ വലിയ ബുദ്ധിമുട്ടുകൾ സൃഷ്ടിക്കുന്നതായും നിവേദനത്തിൽ ചൂണ്ടിക്കാണിക്കുന്നു. ഇരുട്ടിന്റെ മറവിലുള്ള അപകടങ്ങളും സാമൂഹ്യവിരുദ്ധ ശല്യവും ഒഴിവാക്കാൻ മുഴുവൻ ലൈറ്റുകളും അടിയന്തരമായി പുനഃസ്ഥാപിക്കണമെന്ന് KVVES ഭാരവാഹികൾ ആവശ്യപ്പെട്ടു.
തിങ്കളാഴ്ച (20.07.2026) വേങ്ങര പഞ്ചായത്ത് ഓഫീസിൽ വെച്ച് നടന്ന ചടങ്ങിൽ പഞ്ചായത്ത് പ്രസിഡന്റ് ശ്രീ. N.T. നാസർ (കുഞ്ഞുട്ടി) KVVES ഭാരവാഹികളിൽ നിന്നും നിവേദനം സ്വീകരിച്ചു. വിഷയത്തിന്റെ ഗൗരവം ബോധ്യപ്പെട്ട പ്രസിഡന്റ്, പരാതി ഉടൻ പരിശോധിച്ച് ടൗണിൽ എത്രയും വേഗം വെളിച്ചം ഉറപ്പാക്കാനുള്ള നടപടികൾ സ്വീകരിക്കാമെന്ന് കമ്മിറ്റിക്ക് ഉറപ്പ് നൽകി.
KVVES വേങ്ങര യൂണിറ്റ് പ്രസിഡന്റ് സൈനുദ്ധീൻ ഹാജി, ജനറൽ സെക്രട്ടറി ശിവശങ്കരൻ നായർ, ട്രഷറർ എൻ. മൊയ്തീൻ ഹാജി, വൈസ് പ്രസിഡന്റ് T.K. കുഞ്ഞുട്ടി (TKM), സെക്രട്ടറി ഇബ്രാഹിം വെട്ടിക്കാട്ടിൽ തുടങ്ങിയവർ നിവേദനം സമർപ്പിക്കാൻ നേതൃത്വം നൽകി. പൊതുജനങ്ങൾക്കും വ്യാപാരികൾക്കും ഒരുപോലെ തണലായി നാടിന്റെ നന്മയ്ക്കായി എന്നും മുന്നിലുണ്ടാകുമെന്ന് KVVES ഭാരവാഹികൾ വ്യക്തമാക്കി.