ചിനക്കൽ: ലോക ജനസംഖ്യാ ദിനത്തോടനുബന്ധിച്ച് ജി.എച്ച്.എസ് കുറുകയിലെ ഹൈസ്കൂൾ വിദ്യാർത്ഥികൾക്കായി ഡിജിറ്റൽ പോസ്റ്റർ നിർമ്മാണ മത്സരം സംഘടിപ്പിച്ചു. 'ലോകം ജനസംഖ്യാ വർദ്ധനവിന് മുമ്പും ജനസംഖ്യാ വർദ്ധനവിന് ശേഷവും' എന്ന വിഷയത്തെ ആസ്പദമാക്കിയായിരുന്നു മത്സരം നടന്നത്.
സ്കൂളിലെ സോഷ്യൽ സയൻസ് ക്ലബിന്റെ നേതൃത്വത്തിൽ സംഘടിപ്പിച്ച പരിപാടി പ്രധാനാധ്യാപിക പി.കെ. സിന്ധു ഉദ്ഘാടനം ചെയ്തു. ജനസംഖ്യാ വർദ്ധനവിന്റെ പ്രത്യാഘാതങ്ങളെക്കുറിച്ചും വെല്ലുവിളികളെക്കുറിച്ചും വിദ്യാർത്ഥികളിൽ അവബോധം സൃഷ്ടിക്കുക എന്ന ലക്ഷ്യത്തോടെയാണ് മത്സരം ക്രമീകരിച്ചത്.
മത്സരത്തിൽ പത്താം ക്ലാസ് സിയിലെ ഫാത്തിമ റിഫ ഒന്നാം സ്ഥാനം കരസ്ഥമാക്കി. വിജയിക്കുള്ള സമ്മാനദാനവും ചടങ്ങിൽ വെച്ച് നിർവ്വഹിച്ചു. സ്കൂളിലെ സീനിയർ അധ്യാപകൻ പ്രിയേഷ് വിജയൻ, എസ്.ആർ.ജി (SRG) കൺവീനർ സറീന പുളിക്കൽ, സോഷ്യൽ സയൻസ് ക്ലബ് കൺവീനർ കെ. രജീഷ് എന്നിവർ പരിപാടിക്ക് നേതൃത്വം നൽകി.