ഡിജിറ്റൽ ഇടപാടുകൾ ഏറ്റവും കൂടുതൽ നടക്കുന്ന മേഖലകളിലൊന്നാണ് ഹോട്ടൽ രംഗം. എന്നാൽ യു.പി.ഐ. പേയ്‌മെന്റുകൾക്ക് അധിക ഫീസ് ചുമത്താനുള്ള തീരുമാനം ഹോട്ടൽ വ്യവസായത്തെ കൂടുതൽ പ്രതിസന്ധിയിലാക്കുമെന്ന് KHRA വ്യക്തമാക്കി.
അധിക ഭാരം താങ്ങാനാവില്ലെന്ന് വ്യാപാരികൾ
വിലക്കയറ്റവും മറ്റ് സാമ്പത്തിക പ്രയാസങ്ങളും കാരണം നിലവിൽ തന്നെ വലിയ പ്രതിസന്ധിയാണ് ഹോട്ടൽ മേഖല നേരിടുന്നത്. ഇതിനിടയിൽ വരുന്ന അധിക ഫീസ് ചെറുകിട വ്യാപാരികളുടെ സാമ്പത്തിക ഭാരം വർദ്ധിപ്പിക്കുകയും സ്ഥാപനങ്ങളുടെ നിലനിൽപ്പിനെ തന്നെ പ്രതികൂലമായി ബാധിക്കുകയും ചെയ്യും. ഉപഭോക്താക്കൾക്ക് അധികച്ചെലവില്ലാതെ ഉപയോഗിക്കാമായിരുന്ന ഡിജിറ്റൽ സംവിധാനത്തിൽ ഇത്തരം ഫീസുകൾ ഏർപ്പെടുത്തുന്നത് ഓൺലൈൻ ഇടപാടുകളോടുള്ള താല്പര്യം കുറയ്ക്കുമെന്നും അസോസിയേഷൻ ചൂണ്ടിക്കാട്ടി.
അസോസിയേഷൻ മുന്നോട്ടുവെക്കുന്ന പ്രധാന ആവശ്യങ്ങൾ:
1. ഫീസ് വർദ്ധനവ് പിൻവലിക്കുക: 2,000 രൂപയ്ക്ക് മുകളിലുള്ള യു.പി.ഐ. ഇടപാടുകൾക്ക് ഫീസ് ഈടാക്കാനുള്ള നീക്കം അധികൃതർ അടിയന്തിരമായി പിൻവലിക്കണം.
2. ഫീസ് പരിധി ഉയർത്തുക: ഇനി ഫീസ് നിർബന്ധമാക്കുകയാണെങ്കിൽ തന്നെ, അതിന്റെ പരിധി കുറഞ്ഞത് 10,000 രൂപയ്ക്ക് മുകളിലുള്ള വലിയ ഇടപാടുകൾക്കായി പരിഷ്കരിക്കണം.
ഹോട്ടൽ-വ്യാപാര മേഖലയുടെ താല്പര്യങ്ങൾ സംരക്ഷിക്കുന്നതിനും അധികൃതരുടെ ശ്രദ്ധ അടിയന്തിരമായി ഈ വിഷയത്തിലേക്ക് ക്ഷണിക്കുന്നതിനുമാണ് ഇത്തരമൊരു കടുത്ത നിലപാടിലേക്ക് കടന്നതെന്ന് കെ.എച്ച്.ആർ.എ. സംസ്ഥാന പ്രസിഡന്റ് ജി. ജയപാലും ജനറൽ സെക്രട്ടറി എൻ.എം.ആർ. അബ്ദുൽ റസാഖും വാർത്താക്കുറിപ്പിലൂടെ അറിയിച്ചു.